Ils n'eurent pas ſi-toſt
lû ce Billet, qu'ils juge-
rent que c'eſtoit celuy
que le Laquais avoit
donné à la femme du
Financier, qu'il venoit
de ſon Galant, que le
jaloux eſtoit ſon mary,
& que la précipitation
avec laquelle elle eſtoit
allée au rendez-vous,
avoit fait qu'au lieu de
mettre le Billet dans ſa
poche, elle l'avoit mis à
coſté, ou bien qu'en ti-
rant ſon moucheoir, elle
l'en avoit fait tomber.
Antigame croyant que
cet exemple pouvoit
ſervir à ſon deſſein, re-
preſentoit avec un grand
ſens froid, combien cet
homme eſtoit mal-heu-
rex ; Sa femme, diſoit‑
il, conſume le fruit de
ſon travail en foles dé-
penſes, elle le mépriſe,
elle fait une Academie
de ſa maiſon, elle le
deshonore, elle le trom-
pe, & elle luy refuſe ce
qu'une femme doit à ſon
mary, pour en faire un
ſacrifice à ſon Galant ;
aprés cela mariez-vous ?
De bonne-foy, n'auroit‑
ce pas eſté un grand
bon-heur pour ce Finan-
cier s'il euſt eu un amy
comme moy, qui luy
eut repreſenté ce que
c'eſtoit que le mariage,
& qui l'en eut détour-
né. Philogame ſe pre-
nant à rire, luy dit,
ma foy vous eſtes diver-
tiſſant de vouloir tirer à
conſequence la conduite
de gens ainſi faits, &
en qui l'on ne voit ny
prudence ny honneſte-
té, quelle avanie cet
homme ne vient-il pas
de faire en noſtre pre-
ſence ; Il connoiſt ſa
femme emportée, pour-
quoy la pouſſer about ?
Ne devoit-il pas atten-
dre qu'il fut ſeul avec
elle, & qu'elle fut de
ſens froid pour luy re-
preſenter ce qu'il avoit à
luy dire ; faire voir ſa
débauche juſques dans
ſa maiſon, bel exemple
de vertu pour une jeune
femme ; ma-foy, conti-
nua-t'il, ſi elle luy fait
des infidelitez, il ſe les
attire bien ; croyez-moy,
un honneſte-homme qui
aime ſa femme, qui a
des aſſiduitez & de la
conſideration pour elle
s'en fait aimer, & la rend
heureuſe & fidelle. Quoy
dont vous pretendez,
repartit Antigame, que
pour rendre une femme
heureuſe & fidelle, il n'y
a qu'à l'aimer, & avoir
des complaiſances & des
aſſiduitez pour elle ;
Vous vous trompez,
continua-t'il, ces mar-
ques de tendreſſe & ces
aſſiduitez ne rendent une
femme que plus impe-
rieuſe, & ſouvent ne
luy donnent que du mé-
pris & du dégouſt pour
ſon mary, témoin la
Marquiſe de Seliny qui
demande aujourd'huy
une ſeparation d'avec ſon
mary ; Ie luy ay oüy
dire qu'elle n'auroit ja-
mais eu cette penſée, ſi
ſon mary l'avoit moins
aimée, & qu'il eut eu
moins d'aſſiduité auprés
d'elle. Plaiſante cauſe
de ſeparation, reprit
Philogame. Elle eſt jeu-
ne, belle & bien faite,
interrompit Antigame ;
elle a pour Amans des
gens de Robbe10 de la
premiere Qualité ; elle
obtient par leurs credits
tout ce qu'elle veut, &
enfin elle en agy ſi adroi-
tement qu'il y a plus de
deux ans qu'elle n'eſt
plus avec ſon mary, &
qu'elle ſe divertit trés‑
bien à Paris ; il offrit en-
ſuite de la luy faire voir.
Philogame & l'Abbé
trouverent le caractere
de cette femme trop ſin-
gulier pour n'avoir pas
cette curioſité ; elle les
receut fort honnêtement,
elle eſtoit avec un homme
de Robbe appellé Berly,
& avec le beau Cheva-
lier ; comme elle a une
tres-grande demangeai-
ſon de parler de ſon af-
faire, Angatime n'eut
pas beaucoup de peine
à l'y conduire.

De toutes les femmes,
dit-elle, qui ont deman-
dé d'eſtre ſeparées, il
n'y en eut jamais une
qui en ait eu tant de
ſujet que moy, ny qui
ait eu plus de patience :
Ah ! mal-heureuſe que
je ſuis, continua-t'elle,
avec quelle deſtinée bi-
zarre ſuis-je née, les au-
tres femmes ſe plaignent
de leur maris, & veu-
lent s'en ſeparer, parce
que bien loin de les
aimer, & deſtre aſſidus
auprés d'elles, ils les
fuïent, au lieu que ma
cruelle étoille a attaché
mon mal-heur aux aſſi-
duitez incommodes, &
à l'amour exceſſive que
mon mary avoit pour
moy ; dés qu'il me vit à
Rennes, il devint éper-
dûment amoureux, ſa
perſonne, ſon bien, &
ſa qualité enchanterent
ma mere & moy par
conſequent ; le mariage
fut bien-toſt conclu :
Peu de temps aprés il
me tira de cette belle Vil-
le, & me mena dans une
de ſes Terres pour ſe
donner, diſoit-il, tout
entier à moy ; que j'ay
ſouffert dans ce maudit
lieu, il ne vivoit pas avec
moy librement & ſans
façon, comme un mary
vit avec ſa femme ; ce
n'eſtoit que précautions
ridicules, que ſoins im-
pertinens ſur mon cha-
pitre ; il ne faloit pas
penſer à me lever avant
midy, ma ſante auroit
couru riſque ; je n'avois
pas la liberté de me cou-
cher ſur le coſté gauche,
car la foye, diſoit-il, eſt
à craindre, & ſur le dos,
la rate ; quelle viſion
pour tourmenter une
femme ; les fruits je
les aime avec excés,
cependant il ne m'eſtoit
pas permis d'en manger,
à l'entendre dire j'avois
l'eſtomach trop foible ;
pour la promenade, il
n'y faloit pas penſer, le
jour le Soleil hâle le
tein, & échauffe le ſang ;
le ſoir & la nuit enrhu-
ment, & donnent des
iluxions : J'eſtois donc
condamnée à demeurer
les journées entieres dans
ma chambre à travailler
en Tapiſſerie, encore
murmuroit-il le plus ſou-
vent contre l'ouvrage :
Pour luy, il paſſoit tout
le jour les yeux atta-
chez ſur mon viſage,
tantoſt ſe plaignant &
tantoſt ſoûpirant ; que
vos yeux ſont beaux,
Madame, s'écrioit-il,
ah ! la belle bouche,
& avec un tranſport de
fureur, il portoit ſes
groſſes lévres ſur mes
yeux, & les baiſoit ſi
fortement que je crai-
gnois pour ma veuë ;
aprés ces premiers tranſ-
ports il ſe jettoit à mes
genoux ; Pardon, pardon,
s'écrioit-il ; Madame, je
ſuis un témeraire, & un
audacieux, qui devroit
renfermer ſa paſſion dans
le reſpect & dans l'ado-
ration ; Il me ſerroit les
genoux à me les meur-
trir, enſuite il tomboit
dans une profonde mé-
lancolie, il me regardoit
en roulant de gros yeux
étincelans, & pouſſant
de grands ſoûpirs, Que
je ſuis à plaindre, diſoit-il,
cruelle, vous ne m'ai-
mez point, ma preſence
vous fatigue, & vous ne
me voyez qu'avec cha-
grin ; Helas ! en vous
épouſant, je croyois de-
venir le plus fortuné des
hommes, cependant je
n'en ſuis que plus mal-
heureux ; Il eſt vray que
je ſuis maiſtre de voſtre
perſonne, mais voſtre
cœur ne veut point ſe
rendre ; ingratte, repre-
nez la perſonne, ou me
donnez le cœur, il n'en
demeuroit pas à ces pre-
miers tranſports ; Hé
bien, inhumaine, ajoû-
toit-il, puiſque tu vois
avec indifference & avec
mépris la violente paſ-
ſion que j'ay pour toy ;
Tiens, me diſoit-il, en
tirant ſon épée & me
la preſentant, perce de
mille coups ce cœur que
tu fais tant ſouffrir, &
finis des jours que tu
me rends inſupportables :
Voilà, Meſſieurs, de la
maniere qu'il en uſoit,
quand nous eſtions en-
ſemble, aprés cela ne
m'avoüerez-vous pas,
que jamais femme n'a
tant ſouffert que moy,
& n'a eu plus de raiſon de
ſouhaiter d'eſtre ſeparée.
Vous tourmentoit-il,
Madame, dit Antigame,
autant la nuit que le jour.
Vous avez envie de rire,
Monſieur, répondit-elle,
mais il me ſemble vous en
avoir fait aſſez entendre :
Ce diſcours fut pris d'un
ſens plaiſant qui fit rire
toute la Compagnie. En-
ſuite l'Abbé prenant la
parole, luy dit : Permet-
tez-moy, Madame, de
vous repreſenter qu'il
meritoit bien qu'on luy
pardonnaſt tout ſes em-
portemens, puis qu'ils
ne venoient que de la
violence de ſon amour
& du chagrin de n'eſtre
pas aimé. S'il vouloit ſe
faire aimer, répartit la
Dame, il faloit cher-
cher ce qui pouvoit me
re, ſe rendre aima-
ble à mes yeux, & ne
pas me fatiguer par ſa
preſence continuelle, &
par ſes manieres inſup-
portables : J'aime la com-
pagnie, il ne devoit
point me faire ſortir de
Rennes, il faloit y de-
meurer, & attirer dans
ſa maiſon ce qu'il y avoit
de gens bien faits pour
me divertir ; le jeu me
fait paſſer des heures aſ-
ſez agréablement, ainſi
je ne devois jamais man-
quer de Joüeurs, ny
d'argent ; je donne dans
les ajuſtemens, ne devoit‑
il pas tous les mois m'en
fournir des plus beaux,
& des plus à la mode ;
enfin j'aime les plaiſirs,
ſa principale occupation
devoit eſtre de m'en
chercher, & c'eſtoit la
route qu'il devoit tenir
pour aller à mon cœur.
Dites-moy, Madame,
reprit Antigame, com-
ment avez-vous pû vous
tirer des mains de ce
Tyran ? Le plus plaiſam-
ment du monde, répon-
dit-elle ; auprés du Châ-
teau où j'eſtois, il y
avoit un petit bois dans
lequel on trouvoit grand
nombre de mouches can-
tarides ; j'en pris quelques‑
unes, je les fis ſecher,
& me les appliquay ſur
le ſein, en peu de temps
elles firent une grand
excoriation, telle que
je la voulois ; je feignis
d'eſtre malade, & je
faiſois ſi bien, que tantoſt
Monſieur de Seliny me
trouvoit ſoûpirant, d'au-
tresfois regardant le Ciel
en deſeſperée, en d'au-
tres temps pleurant ou
priant Dieu ; je ne luy
parlois que de choſes
funeſtes, de mort, de
Paradis, d'Enfer ; enfin
je joüay ſi bien mon
perſonnage qu'il eut une
forte curioſité de ſçavoir
d'où venoit ce change-
ment ; je prévoyois
bien qu'il l'attribuëroit à
quelque violente paſſion
que j'aurois pour quel-
qu'un, & qu'il avoit
trop de penchant à la
jalouſie pour n'en pren-
dre pas en cette oc-
caſion, il n'y manqua
point ; il n'y a Prieres
qu'il ne me fit, ny ar-
tifices qu'il ne mit en
uſage pour s'éclaicir ſur
ce ſujet ; & comme
je vis un jour qu'il me
reprochoit ma conduite
avec de grandes duretez,
& qu'il ſe plaignoit de
ce que j'en aimois un
autre ; je me jettay à
ſes pieds, & luy dis que
s'il n'y alloit que de ma
vie, je ne luy ferois pas
un aveu qui peut-eſtre
luy donneroit du dé-
gouſt pour ma perſonne ;
mais que mon honneur
y eſtant intereſſé par les
ſoupçons injurieux qu'il
me temoignoit, j'eſtois
contrainte de luy auoüer
que mon ayeule eſtoit
morte d'un Cancer né-
gligé, que ma famille y
eſtoit ſujette, que de-
puis long-temps j'en
avois ſenty quelque at-
teinte, que c'eſtoit la
raiſon pour laquelle il
m'avoit veu ſi froide &
ſi chagrine ; enfin qu'il
avoit paru, & me cau-
ſoit de ſi violentes dou-
leurs que je voyois bien
qu'il ne faloit plus penſer
qu'à la mort ; il voulut
voir le mal, aprés quel-
ques petites façons je
le ſatisfis ; les mouches
cantarides avoient ſi bien
fait qu'il y fut trompé ;
il n'avoit jamais vû de
Cancer, l'affaire n'eſtoit
pas difficile ; enſuite je
me jettay a ſon col les
larmes aux yeux, je
l'embraſſay, je luy dis de
ces ſortes d'adieux tou-
chans, que l'on fait faire
aux mourans, & luy de-
manday ſa parole qu'il
ne ſe remarieroit point
aprés ma mort ; je par-
lay de Teſtament & de
fideicommis en ſa fa-
veur : Mon Dieu ! que je
joüay bien mon rôlle,
quand il m'en ſouvient.
S'il euſt de la douleur à
la nouvelle de ma pré-
tenduë maladie, il euſt
de la joye à ſe croire
tant aimé : Il fit auſſi-toſt
appeller le Chirurgien
de ſon Village qui avoit
oüy parler de Cancer,
mais qui n'en avoit ja-
mais vû, non plus que
luy ; Vous jugez bien
que je n'eus pas beau-
coup de peine à luy en
faire acroire ; la maniere
dont luy débuta Mon-
ſieur de Seliny, en luy
diſant que ſa vie répon-
droit de la Cure, l'ef-
froya extrémement ; je
profitay de cette con-
joncture, & meſnageay
ſi bien ſon eſprit qu'a-
vec quelques Loüis, je
luy fis dire à Monſieur
de Seliny qu'il n'y avoit
point d'homme en Pro-
vince qui ſceut guerir
ces ſortes de maux, &
qu'il n'y avoit qu'un ſeul
Medecin à Paris qui eut
ce ſecret ; je me deffen-
dis de faire ce voyage,
ou plûtoſt je cachay
l'empreſſement que j'en
avois, luy témoignant
que je voulois reſter où
j'eſtois & y mourir en-
tre ſes bras ; il fit de l'ar-
gent, & m'y conduiſit ;
d'abord j'y pris conſeil,
je me ſaiſis de la caſſet-
te, & le quitay, emme-
nant avec moy ma fem-
me de Chambre, & mon
Laquais : Pour la forme,
mon Procureur me dit
qu'il faloit donner une
plainte, & y expoſer
qu'il avoit tiré pluſieurs
fois l'épée ſur moy, ce
que je fis ; j'oubliois de
vous dire que dans le
temps qu'il faiſoit toutes
les folies dont je vous ay
parlé, c'eſt-à-dire, quand
il tiroit dans ma cham-
bre ſon épée ; je criois
feignant d'eſtre effrayée ;
en ſorte que je donnois
lieu à ma femme de
Chambre & à mon La-
quais d'y entrer, & de
l'y trouver en cet eſtat ;
ſi bien que je les ay fait
dépoſer tous deux qu'ils
l'avoient vû l'épée nuë
contre moy, il n'en faut
pas davantage en Iuſtice
pour le faire condam-
ner ; & mon Avocat me
répond que je gagne-
ray infailliblement ma
cauſe. Que vous eſtiez
à plaindre, Madame,
repartit Antigame, mais
auſſi avoüez que Mon-
ſieur de Seliny l'eſt bien
autant, & que pour le
repos de l'un & de l'au-
tre, il vous auroit eſté
avantageux de ne vous
point marier. Ne voyez‑
vous pas, dit Philogame,
en s'adreſſant à Antiga-
me, que le mal-heur ne
vient que de ce que
Madame n'a jamais eu
d'inclination pour Mon-
ſieur de Seliny, & que
ſi elle l'avoit aimé,
leur mariage auroit eſté
accompagné de plaiſirs,
& de douceurs. L'amour,
interrompit Antigame,
n'eſt pas ce qui rend un
mary plus heureux ;
combien y en a-t'il qui
ſouffrent, parce que
leurs femmes les aiment
avec excés. Voilà, re-
prit Philogame, une
choſe aſſez extraordinai-
re, & que vous aurez de
la peine à prouver. Pour
moy, reprit Berly, j'en
ſçay pluſieurs exemples,
& je ſuis perſuadé que
le mary d'une femme
coquette qui ne l'aime
point, eſt moins à plain-
dre qu'un mary qui eſt
aimé de ſa femme avec
excés. Comment cela
ſe peut-il, interrompit
Philogame ? Une fem-
me coquette ne contra-
rie jamais ſon mary,
reprit Berly, elle eſt toû-
jours de meſme ſenti-
ment que luy, elle eſt
enjoüée, elle cherche à le
divertir, elle a à tout
moment des nouvelles,
& des choſes plaiſantes
à luy dire ; lors qu'il
amene ſes amis chez luy,
elle les reçoit le mieux
du monde, elle les réga-
le & ſe divertit avec
eux, s'il veut la careſſer
à la bonne heure, elle
y répond ; luy fait-il
froid, elle ne gronde
ny ne s'en plaint, elle
n'a point ces ſortes de
délicateſſes de cœur qui
ne ſervent qu'à rendre
mal-heureux ; jamais de
jalouſie, jamais d'humeur
fâcheuſe ; ſi elle a une
femme de Chambre qui
plaiſe à ſon mary, elle
ne la chaſſera pas pour
cela : Qu'elle ſe deffende
ſi elle veut, dit-elle,
qu'il attaque bien s'il
peut, ce n'eſt pas mon
affaire ; au lieu qu'une
femme qui aime forte-
ment ſon mary, le dé-
ſole jour & nuit, tan-
toſt par ſes proteſtations
de tendreſſe & d'amour
faites à contre-temps,
tantoſt par des ſoupçons
& des reproches, &
meſme quelquefois par
des injures : Oüy, Valoury
m'a dit ſouvent qu'il n'y
a rien de ſi inſupporta-
ble que ces ſortes de
diſcours dans la bouche
d'une femme pour qui
le cœur ne ſent plus
rien, & qu'il ne l'ex-
perimentoit que trop
avec la ſienne ; elle ne
ceſſe de pleurer, diſoit‑
il, à peine peut-on l'obli-
ger de prendre quelque
nourriture ; ſi je man-
que au repas ou ſi je
découche, elle ne mange
point, & paſſe les nuits
ſans ſe coucher à m'at-
tendre ; elle eſtoit belle,
& avoit de l'embon-
point, mais avec cette
belle maniere de vie,
elle eſt devenuë effroya-
ble ; aprés cela, me
diſoit Valoury, ne faut‑
il pas avoüer que je ſuis
le plus mal-heureux de
tous les hommes en
femme, & que le mary
d'une coquette eſt beau-
coup moins à plaindre
que moy. J'ay oüy par-
ler, reprit le beau Che-
valier, de la conduite de
Valoury avec ſa femme,
il y a tant d'ingratitude
qu'on ne ſçauroit l'ex-
cuser : Elle eſtoit fille
lors qu'il en devint a-
moureux, & elle fut
ſenſible à ſa paſſion ;
mais comme elle eſtoit
unique, & qu'elle avoit
plus de bien & de
naiſſance que luy, ſon
pere s'y oppoſa ; cette
fille l'aima ſi fortement
qu'elle feignit de reſ-
ſentir des fruits de ſon
amour, il n'y a mauvais
traitement qu'elle ne re-
ceut de ſon pere ; cepen-
dant elle demeura toû-
jours ferme & conſtan-
te : Enfin le pere croyant
l'affaire ſans remede,
pour reparer l'honneur
de ſa famille, conſentit
à leur mariage ; ce mal-
honneſte homme n'eut
pas eſté quinze jours
avec elle, quoy qu'elle
fut belle, aimable, &
qu'elle eut la derniere
tendreſſe pour luy, qu'il
prit du degouſt pour
elle, & s'attacha auprés
d'une perſonne qui avoit
beaucoup moins de me-
rite. Mon Dieu ! que
vous eſtes ſotte, Mada-
me de Valoury, inter-
rompit bruſquement,
Madame de Seliny, Ah !
ſi voſtre époux avoit
eu à faire à moy, que
je l'aurois bien reduit.
Comment auriez-vous
fait, repartit Antigame.
Un homme, reprit-elle,
lors qu'il croit poſſeder
entierement une femme,
& qu'il n'a rien à crain-
dre ny a ſouhaiter au de-
là, tombe dans l'indiffe-
rence pour elle ; c'eſt ce
qui a fait que Valoury
voyant qu'il poſſedoit
ſeul ſa femme & ſans
partage a ceſſé de l'aimer.
Pour moy, j'en aurois agy
plus prudemment qu'el-
le, dés que je me ſerois
apperçûë que mon mary
n'auroit plus en ſes pre-
miers empreſſemens pour
moy, je me ſerois fait
des Amans que j'aurois
attiré dans le logis pour
les luy faire voir ; la ja-
louſie auroit auſſi-toſt
réveillé ſa tendreſſe aſ-
ſoupie, & me l'auroit
ramenée ; que j'aurois
eu de plaiſirs à faire un
peu la cruelle, & à le
rebuter au commence-
ment ; je ſerois deve-
nuë une ſeconde bonne
fortune pour luy ; voilà
d'où vient continua-t'el-
le, que les femmes
adroites & galantes ſont
plus aimées de leurs
époux que les autres ; la
raiſon eſt que leurs époux
ne ſe trouvans pas dans
cette poſſeſſion tranquile
qui conduit à l'indiffe-
rence, ils ſouhaitent,
ils craignent, ils eſpe-
rent, ils deſeſperent, ils
ſe conſolent, & c'eſt
dans ces differentes agi-
tations que ſe nourit l'a-
mour; au lieu que les
maris des femmes de
l'humeur & du caracte-
re de Madame de Va-
loury reviennent diffici-
lement à les aimer à
cauſe qu'ils ne ſentent
point la diverſité de ces
mouvemens, leur poſſeſ-
ſion eſtant paiſible &
ſans trouble. Les fem-
mes, reprit le beau
Chevalier, ne man-
quent jamais d'adreſſe
dans la conduite de leurs
amours, & aprés ce que
Madame de Valoury a
fait, l'on peut dire avec
raiſon que rien ne leur
eſt impoſſible ; avoir eu
le ſecret de devenir une
ſeconde bonne fortune
à ſon mary, l'avoir fait
trouver pluſieurs fois à
deux & trois heures
aprés minuit à des ren-
dez-vous, luy avoit cau-
ſez de ces ſortes de tranſ-
ports, dont les Amans
les plus paſſionnez ſont
capables, & enfin en
avoir tiré un bel enfant ;
dites-moy, n'eſte-ce pas là
l'entendre ? Cela eſt fort
plaiſant, répondit Ma-
dame de Seliny, je vous
prie, Monſieur, expli-
quez-vous. Madame
de Valoury, reprit le
Chevalier, aimoit éper-
dûment ſon mary, il
n'avoit cependant pour
elle que du dégouſt, il
ne pouvoit ſouffrir ſa
compagnie, & faiſoit
lit à part, ce qui jettoit
cette pauvre femme dans
le dernier chagrin ; com-
me elle cherchoit un
jour la cauſe d'une ſem-
blable conduite, il luy
vint dans l'eſprit qu'il
faloit que ſon mary fuſt
engagé ailleurs ; elle dé-
couvrit que c'eſtoit au-
prés d'une jeune veuve
de ſon voiſinage ; elle
fit ſocieté avec elle,
& la ménagea avec
tant d'eſtprit & d'adreſſe
qu'elle devint ſa meil-
leure amie. Cette veu-
ve avoit un Procés con-
tre les Parens de ſon
mary ſur ſa Qualité de
veuve, & ſur l'eſtat de
ſes enfans ; elle n'eſtoit
pas des plus accommo-
dées, & ce Procés la
conſumoit en frais. Ma-
dame de Valoury profita
de cette occaſion, elle
ſolicita pour elle auprés
de ſes Juges, luy preſta
de l'argent, & enfin luy
rendit tant d'autres ſer-
vices qu'elle l'engagea
entierement dans ſes in-
tereſts ; elle y eut d'au-
tant moins de peine que
le cœur de cette veuve
avoit pris party ailleurs,
ce qui l'obligea de faire
confidence à Madame
de Valoury de la paſſion
que ſon mary avoit pour
elle, des diſcours qu'il
luy avoit tenus, des pre-
ſens qu'il luy avoit voulu
faire, & enfin des
manieres vives avec leſ-
quelles il la preſſoit.
Madame de Valoury
voulut qu'elle ne refu-
ſaſt point l'argent ny les
preſens, offrant de livrer
la marchandiſe pour elle ;
& voicy comment de
concert elles conduiſi-
rent l'affaire. La veuve
receut l'argent & les
preſens, & feignit de ſe
rendre ; mais ce qui luy
ſembloit le plus difficile,
à ce qu'elle diſoit à
aloury, eſtoit de trou-
ver un lieu pour le ren-
dez-vous, parce qu'elle
eſtoit obſervée de fort
prés par ſes Parties,
que ſa femme de Cham-
bre ne la quitoit point
toute la journée, qu'el-
le s'en défioit, qu'elle
avoit une petite fille
éveillée qui obſervoit
tout de fort prés, &
qui parloit beaucoup, &
qu'ainſi elle avoit de
grandes meſures à gar-
der avec ces deux per-
ſonnes, à moins qu'elle
ne vouluſt ſe perdre.
Valoury voyant les dif-
ficultez qui ſe trou-
voient pendant le jour
offrit de venir la nuit,
quand tout le monde
ſeroit couché ; il luy dit
qu'elle n'avoit qu'à luy
donner le paſſe-par-tout,
& comme pour l'aller
trouver il n'y avoit
qu'une ſalle à paſſer dans
laquelle perſonne ne cou-
choit, il s'y rendroit
ſans eſtre vû & ſans
bruit, & qu'avant le
jour il ſe retireroit. La
veuve luy repreſentoit
que ſa femme de Cham-
bre & ſa petite fille
couchoient dans un pe-
tit cabinet à coſté de ſa
chambre, & qu'il ne fa-
loit ny parler ny faire le
moindre bruit. Le paſſe‑
par-tout donné, Valoury
ne manqua point au
rendez-vous. Madame
de Valoury s'eſtoit miſe
à la place de la veuve,
& la veuve s'eſtoit reti-
rée dans une autre
chambre : Valoury ſe
plaça auprés de ſa fem-
me ſans bruit & ſans
que perſonne du logis
s'en apperceut : Elle ne
parloit point, & il ne
pouvoit la voir à cauſe de
l'obſcurité ; ſi bien qu'el-
le n'euſt pas de peine à
paſſer pour la veuve dans
un lieu, où il ne pouvoit
concevoir qu'il y eut
une autre femme. Ja-
mais homme ne fut ſi
charmé de ſa bonne for-
tune, ny dans des ra-
viſſements de plaiſirs
plus grands : Enfin la
pauvre femme craignoit
pour la vie de ſon mary,
ou du moins pour ſa
ſanté ; le jour appro-
chant il ſe retiroit, &
continua ce petit com-
merce quelque temps ;
ce qu'il y a de plaiſant
ce ſont les converſations
qu'il avoit pendant le
jour avec cette veuve,
touchant les plaiſirs de
la nuit ; elle étouffoit
quelque-fois de rire,
tant il pouſſoit l'exage-
ration : Pour s'en mieux
divertir elle luy deman-
doit froidement la diffe-
rence de ceux qu'il goû-
toit avec ſa femme.
Avec ma femme, ré-
pondit-il, je n'en reſſens
aucun, ce n'eſt que par
devoir ou plûtoſt par
neceſſité, & ſi je n'avois
beſoin d'elle pour trou-
ver de l'argent chez le
Notaire, je ne pourois
jamais m'y reſoudre :
Elle a, continuoit-il, la
chair molle, la peau
rude, elle n'a point de
gorge, elle eſt ſeiche,
ſes lévres ſont froides
& glacées, ſe peut-il
rien de plus dégoûtant.
Il faut avoüer, dit Ma-
dame de Seliny, en éle-
vant les yeux & les
mains au Ciel qu'il y a
d'étranges manies ſur le
chapitre de l'amour ;
Valoury ne peut ſouffrir
ſa femme, quand il la
connoiſt ; elle a la chair
molle, la peau rude,
elle n'a point de gorge,
elle eſt ſeiche, & les
lévres ſans feu ; & ce-
pendant quand il ne la
reconnoiſt pas pour ſa
femme, & la prend
pour un autre, il ne luy
trouve aucun de ces
défauts, & il a pour elle
toute la tendreſſe &
l'empreſſement poſſible :
Mais d'où vient cela,
continua-t'elle, qui m'en
peut donner une bonne
raiſon. Il la prenoit,
répondit le Chevalier,
pour une autre que ſa
femme ; changement de
mets réveille l'appetit.
Ce raiſonnement n'eſt
pas juſte, reprit Madame
de Seliny, puis qu'il
trouve le meſme objet
tantoſt deſagreable &
dégoûtant, & tantoſt
agreable & charmant.
C'eſt peut-eſtre, re-
prit Berly, parce que
comme les plaiſirs des
perſonnes mariées ſont
permis, ils ne touchent
point vivement les ſens ;
la loy, & la deffence
ſont des aſſaiſonnemens
au plaiſir, & je me
ſouviens à ce ſujet
d'un mot libertin que
j'ay oüy dire ſouvent
en Italie pour exage-
rer le plaiſir ſenſible,
quale guſto ſi foſſe peccato.
Ce raiſonnement n'eſt
pas juſte, reprit Mada-
me de Seliny, Madame
de Valoury aime avec
paſſion ſon mary, &
dans voſtre penſée elle
ne devroit pas l'aimer,
puisſque ce n'eſt pas un
peché en elle de l'ai-
mer : Je vois, continua‑
t'elle, que la veritable
raiſon eſt celle que je
vous diſois tout à l'heure,
qui eſt, que l'amour meur
dés qu'il n'agit point ;
Valoury n'avoit rien à
ſouhaiter de ſa femme,
elle eſtoit toute à luy,
il deſpoſoit comme il
vouloit de ſon cœur &
de ſa perſonne, & voi-
là ce qui étouffe l'a-
mour : Pour ſa Maiſtreſ-
ſe, il n'alloit que dans
certaines heures de la
nuit chez elle ; il y avoit
ſans doute du peril, il
ſentoit quelquefois des
craintes & des frayeurs,
& c'eſt ce qui nourriſſoit
ſon amour, & ce qui
redoubloit ſes empreſ-
ſemens, & ſes tranſ-
ports pour ſa femme,
quand il la prenoit pour
ſa Maiſtreſſe : A ce pro-
pos je me ſouviens,
continua-t'elle, d'une
Dame de mes amies qui
a plus de quarante ans
bien comptez, & pour
qui le mary a autant
d'empreſſement que le
premier jour qu'il l'a é-
pouſée ; voicy comment
elle ſe l'eſt conſervé ;
elle eſt fiere, & ne luy
ſouffre jamais de fami-
liarité ; ſon lit eſt à
part, & ſi le mary veut
paſſer la nuit avec elle,
elle fait la difficile, l'em-
portée, luy fait ache-
ter ſes faveurs, & ſe
fait donner chaque fois
un bijou.
Fin de la premiere Partie.





Sophronie eſtoit offi-
cieuſe, humble & diſ-
crette avec ſon mary ;
elle avoit dans ſon do-
meſtique une grande
douceur meſlée d'un peu
de ſeverité, avec laquel-
le elle ſçavoit ſe faire
aimer, & engageoit un
chacun à faire ſon de-
voir, ſans jamais crier
ny quereller ; & ſi quel-
que choſe n'alloit pas
dans l'ordre, avec des
raiſons fines, & adroite-
ment inſpirées, elle ra-
menoit les eſprits & les
portoit à ſe faire juſtice
les premiers ; il ne ſe
pouvoit qu'avec une
conduite auſſi honneſte
& auſſi engageante, elle
ne touchaſt le cœur de
Singamis : Cependant
pour eſtre marié, il ne
laiſſoit pas d'avoir quel-
que reſte de ſes premie-
res inclinations, ſoit
pour la table, ſoit pour
le jeu, ſoit pour ſes
anciennes Maiſtreſſes.
Singamis aimoit à re-
galer ſes amis, Sophro-
nie les recevoit le mieux
du monde ; elle avoit
doûjours un viſage ou-
vert & riant ; elle diſoit
cent jolies choſes, &
tout eſtoit ſi bien or-
donné chez-elle, qu'ils
s'y plaiſoient plus que
par tout ailleurs. Quand
Singamis revenoit du
jeu fort tard, elle eſtoit
la premiere à luy ouvrir
la porte avec un air gay
& careſſant, & s'il ſe
plaignoit de ce qu'elle
ne s'eſtoit point cou-
chée, elle luy répon-
doit que ſes Domeſti-
ques avoient veillez les
nuits precedentes, &
qu'elle vouloit veiller à
ſon tour, afin qu'ils fuſ-
ſent plus en eſtat de luy
rendre ſervice le lende-
main ; qu'elle pouroit
dormir la matinée, &
qu'enfin elle eſtoit bien‑
aiſe de boire avec luy
Lorzat, le Sorbec11, ou
la liqueur qui eſtoit de
ſaiſon, & qu'elle avoit
ſoin de tenir toûjours
preſte à ſon arrivée ; ſi
elle remarquoit ſur le
viſage de ſon mary quel-
que chagrin pour la
perte qu'il avoit faite
au jeu, ſans témoigner
qu'elle s'en appercevoit,
elle luy parloit de gens
qui devoient luy appor-
ter bien-toſt de l'argent,
& tournoit toûjours l'é-
tat de leurs affaires du
meilleur coſté ; ce qu'el-
le avoit le plus de peine
à digerer eſtoit le com-
merce de ſon mary avec
ſes anciennes Maiſtreſ-
ſes, elle ne s'en plai-
gnoit point, & ne luy
en faiſoit pas un plus
meſchant viſage ; mais
quand elle avoit fait
quelque nouvelle dé-
couverte là-deſſus, elle
ſe retiroit dans ſon cabi-
net & fondoit en larmes.
Si ſon mary la ſurpre-
noit en cet eſtat eſſuyant
promptement ſes yeux
& cachant ſa douleur,
elle reprenoit ſon pre-
mier viſage, & vivoit
également avec luy ; &
ſi Singamis vouloit aller
au devant & ſe juſti-
fier, elle recevoit tout ce
qu'il diſoit d'un air doux
& ſoûmis, luy faiſoit
entendre qu'elle ne ſe
croyoit pas aſſez de me-
rite pour le poſſeder tout
entier, & qu'elle n'eſtoit
pas née pour un ſi grand
bon-heur. Quoy qu'une
conduite auſſi ſage, &
auſſi touchante que celle
de Sophronie fut capa-
ble de retirer Singamis
de toutes ſes jeuneſſes &
de ſes libertinages ; un
fils & une fille qu'elle
avoit de luy, & auſquels
elle avoit donné une tres‑
belle education luy fu-
rent d'un grand ſecours :
Ces Enfans chantoient,
danſoient & joüoient
fort bien du Claveſin ;
ils ſçavoient le Blazon12,
la Geographie, la Chro-
nologie & l'Hiſtoire.
Admirez, je vous prie,
combien une femme
honneſte, ſpirituelle &
aidée par des Enfans ai-
mables, & bien élevez
a de pouvoir ſur l'eſprit
de ſon mary pour le ra-
mener à ſon devoir :
Cét homme qui n'aimoit
que le gros jeu, les
grands repas, les femmes
& la débauche, ne joüe
plus qu'avec ſes Enfans,
ne veut plus manger que
dans ſa maiſon, & ne
peut plus ſouffrir d'au-
tre compagnie que celle
de ſa femme. Je ne puis,
diſoit-il, ſouvent à ma
mere, je ne puis aſſez
admirer mon change-
ment ; j'ay fait ce que
j'ay pû avant que d'eſtre
marié pour me guerir
de la paſſion du jeu ;
j'eſtois inceſſament au
Cabaret, & parmy les
femmes, nonobſtant les
reproches que je m'en
faiſois, & les remors que
j'en ſouffrois ; & preſen-
tement j'ay un ſi grand
dégouſt, & une ſi gran-
de horreur pour ces ſor-
tes de choſes, que je ne
puis concevoir quelle
ſatisfaction j'y trouvois
alors ; mon unique plai-
ſir eſt d'eſtre avec ma
femme & mes Enfans ;
je paſſe les journées le
plus agreablement du
monde à les voir joüer
& ſe careſſer, & toute
mon ambition ne tend
qu'à leur donner une
belle education, & qu'à
leur faire une groſſe for-
tune. Comme la Com-
teſſe de Réal parloit ainſi,
la Baronne de Chardon-
nay prenant la parole,
luy dit, Madame l'on
ne peut avoir plus de
plaiſir que nous en avons
à vous entendre, &
noſtre party eſt pris de
ne vous point quitter
que nous n'ayons oüy la
fin de voſtre Hiſtoire,
quoy que l'heure de la
Comedie approche, &
que nous nous ſoyons
engagez à nous y trou-
ver, comme vous ſçavez.
Je vous entens, reprit la
Comteſſe de Réal, vous
voulez que je finiſſe ; je
vous obéïray, Madame,
auſſi bien Antigame ſouf-
fre trop au recit des plai-
ſirs que Singamis a trou-
vez dans le mariage ; mais
qu'il ne s'y trompe pas,
je le tiens encore plus mal
diverty dans tout ce que
j'ay à luy dire ſur le Cha-
pitre d'Agamis.

Pour finir, continua
la Comteſſe, Singamis
& Sophronie ayans mis
toute leur occupation &
leur plaiſir à former l'eſ-
prit, & le cœur de leur
fils & de leur fille, & à
leur amaſſer du bien, en
firent des perſonnes ache-
vées, les rendirent les
meilleurs partis de Paris,
& les marierent à des
perſonnes qui apparte-
noient aux Miniſtres,
ce qui leur donna une
grande élevation dans le
monde ; & fit que Sin-
gamis ayant eu occaſion
de faire connoiſtre ſon
merite, le Roy luy don-
na un employ conſide-
rable dans lequel il vieil-
lit avec honneur, &
mourut avec conſtance
& avec fermeté entre les
bras de ſa femme qui le
conſoloit dans ſes der-
niers momens, en luy
diſant que ce n'eſtoit pas
mourir que de laiſſer au
monde des Enfans faits
comme les ſiens. Aprés
ſa mort Sophronie diſ-
poſa de ſes biens, & ſe
retira dans un Convent,
où elle mourut en odeur
de ſainteté.

Vous venez de voir,
continua la Comteſſe,
la vie & la mort de
Singamis, qui s'eſtoit
marié par le conſeil de
ma mere ; vous allez
oüir la vie & la mort
d'Agamis ſon frere qui
ne voulut jamais y en-
tendre ; aprés quoy vous
jugerez ſi je n'ay pas
raiſon de conſeiller le
mariage.

Agamis jeune, bien
fait, riche, de qualité,
galant, ſans femmes, &
ſur le pied de ne vouloir
jamais ſe marier, ne
manqua pas de trouver
de ces ſortes de bonnes
fortunes aprés leſquelles
les jeunes gens courent
avec tant d'avidité ;
cependant paſſer des
heures entieres caché
dans un cabinet & quel-
ques fois dans une ar-
moire, ſans oſer preſ-
que reſpirer ; d'autres-
fois deſcendre prompte-
ment avec des draps
noüez par la feneſtre
d'une chambre dans la
ruë à la faveur des tene-
bres, & dans la crainte
d'eſtre ſurpris par le
Guet : Entendre en ſe
retirant chez ſoy ſifler
à ſes oreilles les balles
de mouſquet, eſtre at-
taqué par des Aſſaſſins ;
ingratitude & infidelité
de Maiſtreſſes, Mede-
cin, Chirurgien, la pluſ-
part du temps aux
trouſſes furent des rai-
ſons qui rebuterent Aga-
mis de ces pretenduës
bonnes fortunes, & luy
firent prendre la reſolu-
tion de s'attacher à une
ſeule perſonne avec la-
quelle il s'imaginoit pou-
voir mener une vie
agreable & tranquile :
Il jetta les yeux ſur
Scortine qui eſtoit une
fille ſous la conduite
d'une mere peu com-
mode pour le bien, &
femme à tout ſouffrir
pour un bon repas ou
pour le moindre profit ;
la friponne de Scortine
joüa bien ſon rôlle, ce
n'eſtoit pas une grande
beauté, mais elle avoit
dans ſon air & dans ſes
manieres je ne ſçay quoy
de tendre, & de tou-
chant qui engagoit ;
auſſi fit-elle faire bien
du chemin à Agamis.
A la voir vous l'auriez
priſe pour la fille de
France la plus ſage, &
elle avoit déja trompé
bien des gens qui l'a-
voient regardée comme
une bonne fortune :
Agamis donna dans le
piege plus avant que
tous les autres ; Billets 13
doux, vers, declarations
d'amour, Comedies,
Opera, bagues, croix de
diamans, & coliers de
perles ; enfin tout fut
mis en uſage avant que
d'écouter Agamis : En-
core luy fit-elle entendre
qu'elle ne ſe rendoit qu'à
la violente paſſion qu'el-
le avoit pour luy. Un
jour comme elle eſtoit
preſſée (jugez du ca-
ractere de cette artifi-
cieuſe elle ſe jetta aux
pieds d'Agamis, luy
proteſta qu'elle n'avoit
jamais aimé perſonna au-
tant qu'elle l'aimoit, &
luy ſerrant les genoux &
fondant en larmes, elle
le prioit inſtament de
ne la point perdre en fai-
ſant un meſchant uſage
de la tendreſſe qu'elle
avoit pour luy. Ce diſ-
cours arreſta tout court
Agamis, il eſtoit enne-
my des violences. Vous
ne m'aimeriez plus, mon
cher, continua-t'elle, &
enſuite ſe levant com-
me triomphante, elle
ſa va jetter dans un fau-
teüil d'où elle regardoit
Agamis avec des yeux
inſultans : Le pauvre
Garçon m'a avoüé depuis
qu'il avoit eſté ſur le
point d'aller luy deman-
der pardon, lors que
Scortine ſe mettant à
rouller des yeux languiſ-
ſans feignit de s'éva-
noüir : Agamis vint à
ſon ſecours, & inſen-
ſiblement oubliant ſa
vertu, il ſe laiſſa aller au
tranſport de ſon amour.
Non ! Lucrece violée ne
fit point voir des ſenti-
mens de douleur & de
vangeance ſi vifs, & ſi
ardens ; vingt fois elle
ſauta à l'épée d'Agamis,
& vingt fois elle feignit
de vouloir ſe tuer. La
fourbe, l'artificieuſe,
c'eſtoit pour donner une
plus grande idée d'elle à
Agamis.

Vous jugez bien qu'a-
yant commencé par ce
premier perſonnage, elle
en fit bien d'autres. A
en juger par les appa-
rences, elle avoit une
inclination pour Agamis
au de-là de tout ce que
l'on peut concevoir, au
moindre petit mal, ou
moindre chagrin qu'il
avoit, elle eſtoit deſo-
lée. Non jamais fille n'a
paru ſi deſintereſſée ;
elle auroit, diſoit-elle,
ſacrifié, biens, vie &
honneur pour luy ; elle
avoit haï generalement
tous les hommes, &
elle ne pouvoit con-
cevoir comment elle
avoit eſté capable d'une
ſi violente paſſion pour
Agamis ; cependant tout
cela n'eſtoit qu'artifice,
& que fourberie, où
l'intereſt ſeul avoit part ;
& ce n'eſtoit pas une
affaire pour elle d'entre-
tenir deux & trois hom-
mes ; cependant le pau-
vre Agamis donnoit groſ-
ſierement dans le pan-
neau, il ſe croyoit le
plus heureux de tous les
hommes d'avoir trouvé
une perſonne ſi raiſon-
nable, ſi vertueuſe, &
qui l'aimoit ſi tendre-
ment ; ce qui fit qu'il ſe
détacha de tout autre
engagement pour ſe don-
ner entierement à elle ;
dés qu'elle s'en fut ap-
perçûë, elle commença
par ſe rendre Maiſtreſſe
de ſa maiſon, elle y mit
des Domesſtiques de ſa
main ; elle voulut avoir
la bource en faiſant la
bonne Econome, & meſ-
nagea ſon eſprit de telle
ſorte qu'elle le broüilla
avec ſa famille, & le fit
rompre avec tous ſes
anciens amis. Enfin tout
n'alloit chez luy que par
l'ordre de Scortine : Elle
euſt un fils, le mal-heu-
reux Agamis en eſtoit
fol, il ne penſoit qu'à
tromper la loy pour le
rendre Maiſtre de tout
ſon bien aprés ſa mort :
Scortine profitant de
cette occaſion, luy fit
faire dans une maladie
qu'il eut pluſieurs Obli-
gations à ſon profit, &
à celuy de quelques-uns
de ſes Galans : Agamis
croyoit de ne rien riſ-
quer eſtant maiſtre des
Obligations. Pour con-
cluſion le fils de Scor-
tine donna mille cha-
grins à Agamis ; il paſ-
ſoit les journées entieres
dans le cabaret, & dans
de meſchans lieux ; il ne
frequentoit que des Fi-
loux : tantoſt on le rap-
portoit plein de vin, &
ſans connoiſſance ; d'au-
tresfois dangereuſement
bleſſé ; un autre jour il
faloit le cacher, parce
qu'il avoit bleſſé ou tué
quelqu'un ; d'autresfois
il eſtoit dans les cachots,
& à la veille d'une con-
damnation honteuſe &
infâme. Enfin il pouſſa
ſi loin ſa brutalité qu'il
voulut battre, & meſme
tuer pluſieurs fois Scor-
tine & Agamis. Scor-
tine ne veſcut pas mieux
dans la ſuite que ſon fils ;
elle ſe donna à mille
Coquins avec leſquels
elle beuvoit, & faiſoit
cent autres infamies qui
acheverent de perdre ſa
reputation & de ruiner
ſa ſanté ; elle communi-
qua ſon mal à Agamis
qui commença à le re-
connoiſtre, & voulut
prendre des meſures pour
ſe tirer de ſes mains ;
mais elle s'en apperçu,
ce qui fit qu'elle luy
donna un poiſon lent,
luy vola la clef de ſon
cabinet, & prit ſon
argent, & toutes les
Obligations qu'il avoit
ſignées pendant ſa mala-
die ; ſe retira de la mai-
ſon d'Agamis, & en
vertu de ces Obligations,
elle fit ſaiſir tous ſes
biens, & l'en dépoüilla
entierement ; de ſorte
que le pauvre Agamis
abandonné & mépriſé
de tout le monde, gâté
& perdu par les maux,
& par le poiſon qu'elle
luy avoit donné, mou-
rut dans une extrême
miſere & dans le dernier
deſeſpoir.

La Comteſſe de Réal
n'eut pas ſi-toſt ceſſé de
parler, que toute la Com-
pagnie ſe declara pour
le mariage, & fut du
ſentiment de Philoga-
me. La Marquiſe de
Seliny ſe declara plus
fortement que les au-
tres, elle diſoit qu'une
honneſte femme a toû-
jours dans le cœur de
certains ſentimens de
vertu qui donnent in-
comparablement plus de
ſatisfaction que les ma-
nieres déreglées d'une
Concubine, & que l'en-
fant legitime ſe ſent
toûjours de la dignité
de ſon origine ; au lieu
que l'enfant naturel ex-
prime le plus ſouvent
dans ſes actions la honte
de ſa naiſſance, & le
déreglement des mœurs
corrompuës de ſon pere
& de ſa mere ; & finit
en diſant d'un ton rail-
leur & piquant, qu'il
faloit avoir l'eſprit d'un
caractere bien extraordi-
naire, & bien bizarre
pour ſoûtenir une opi-
nion contraire : Anti-
game ne laiſſoit pas de
perſiſter dans ſon avis ;
il prétendoit meſme que
l'on n'avoit jamais vû
d'enfant naturel ny de
Concubine, commettre
des actions auſſi énor-
me & auſſi dénaturées
que celles qui avoient
eſté commiſes par des
enfans, & des femmes
legitimes. N'avons-nous
pas vû, diſoit-il, une
fille legitime nourir pen-
dant trois années, &
mettre à l'execution l'hor-
rible deſſein d'empoiſon-
ner ſon propre pere qui
l'aimoit tendrement, &
dont elle avoit receu
mille biens-faits : A-t'on
jamais rien oüi de pareil
d'un enfant naturel ?
Tout fraiſchement ne
venons-nous pas de voir
une femme donner de
l'argent pour faire aſſaſ-
ſiner ſon mary. Une au-
tre ſuſciter à ſon mary
une accuſation calom-
nieuſe qui devoit l'ex-
poſer aux ſupplices les
plus cruels, & les plus
infâmes : Sont-ce là des
actions qui ſoient ja-
mais tombées dans la
penſée d'un enfant ille-
gitime & d'une Concu-
bine ; & cependant ce
ſont des crimes qui ont
eſté executez par des
enfans & par des femmes
legitimes, & de qualité.
L'on dit que Scortine
a empoiſonné Agamis,
quelle apparence ! ſa
mort auroit fait trop de
bruit dans le monde, &
une action ſi noire n'au-
roit pû éviter les rigueurs
de la Chambre ardente ;
pour l'avoir volé, cela
pouroit eſtre ; mais com-
bien de femmes en ont
fait autant, continua‑
t'il, en regardant avec
un ſouris malicieux la
la Marquiſe de Seliny,
& ont plié la toilette de
leurs maris ; elle en rou-
git : La Baronne s'en ap-
perceut, & craignant
que la converſation ne
s'échauffaſt, pour dé-
tourner les coups, elle
ſe leva bruſquement, &
jettant les yeux ſur ſa
montre, elle dit qu'elle
craignoit que la Come-
die ne fut commencée,
& qu'il ne faloit point
perdre de temps, & y
aller, ce qu'elle fit
avec toute la Compa-
gnie, excepté Philoga-
me, Antigame & l'Abbé
Sophin qui prirent le
party de la promenade.
Mais à peine le Caroſſe
eſtoit-il ſorty du Faux-
bourg Saint Germain,
qu'Antigame prenant la
parole, dit : Voilà des
femmes bien folles, &
bien dégoûtantes ; com-
ment cette Baronne de
Chardonnay oſe-t'elle
ſoûtenir avec un doigt de
blanc & de rouge ſur le
tein cet air de prude :
Cette effrontée de Com-
teſſe de Réal ne devroit‑
elle pas mourir de honte
de reciter une Hiſtoire
auſſi impudente que cel-
le de Scortine ; & de
cette friponne de Seli-
ny, qu'en dites-vous ?
voler ſon mary, le qui-
ter, & luy faire un Pro-
cés en ſeparation, parce
qu'il l'aime trop : Que je
plains, continua-t'il, de
pauvres maris qui ont
de ſemblables femmes.
Ah ! que Leſbie eſt bien
éloignée de ces ſortes de
deffauts. Toutes les fem-
mes que je vois ne ſer-
vent qu'à la rendre plus
aimable à mes yeux,
l'eau toute pure eſt ſon
fard, la rencontre des
yeux d'un homme l'a fait
rougir ; elle me garde
deux mille Loüis14 que je
tiens plus ſeurs que dans
mes coffres ; elle eſt ſi
deſ-interreſſée que je ne
pouvois l'obliger à rece-
voir le Rubis que je luy
ay donné. Tout ce qu'a
fait Leſbie pour vous,
interrompit Philogame,
n'approche point des
obligations que j'ay à
Fraudeliſe ; elle avoit
congedié Philabel ; elle
eſtoit à la veille de qui-
ter le monde, & de s'en-
gager dans un Convent ;
& pour moy ſeul elle a
changé de reſolution, &
n'aime que moy.

Dans le temps que
Philogame parloit ainſi,
le Ciel vint à ſe couvrir
d'un nuage ſi épais & ſi
obſcur, qu'à peine Phi-
logame, Antigame &
l'Abbé Sophin pouvoient
à la faveur des éclairs
diſtinguer & reconnoî-
tre leur chemin ; ce qui
obligea le Cocher de
conduire promptement
ſon caroſſe dans le pre-
mier Cabaret. Philoga-
me, Antigame & l'Ab-
bé Sophin eſtant deſcen-
dus de caroſſe entrerent
dans la premiere chambre
de ce Cabaret, ils y trou-
verent deux hommes qui
conteſtoient enſemble ſur
la qualité & ſur la beauté
d'un Rubis ; celuy qui
tenoit le Rubis dans ſa
main, & qui en eſtoit
le Maiſtre, diſoit que
c'eſtoit un Rubis d'O-
rient ; l'autre au con-
traire ſoûtenoit que ce
n'eſtoit qu'un Rubis ba-
let. Antigame ſe ſou-
venant, que quoy que
le Rubis qu'il avoit don-
né à Leſbie fut d'Orient,
il y avoit eu bien des
gens qui l'avoient pris
pour un Rubis balet,
eut la curioſité de voir
celuy que cet homme
tenoit ; ſi bien qu'avan-
çant doucement par der-
riere, il le vid de fort
prés ; il luy ſembla qu'il
avoit beaucoup de reſ-
ſemblance avec celuy
qu'il avoit donné à Leſ-
bie, ce qui luy cauſa de
l'émotion : L'homme qui
tenoit le Rubis ayant
tourné la teſte & vû
Antigame en cet eſtat,
cacha promptement le
Rubis ; & nonobſtant
la groſſe pluye qu'il
faiſoit, ſortit du Caba-
ret accompagné de la
perſonne avec qui il
eſtoit.



Je voudrois bien con-
noiſtre, dit Antigame,
celuy à qui appartient le
Rubis. Je ne le connois
point, repartit Philoga-
me ; pour celuy avec
qui il eſt ; je ſçay ſon
nom, continua-t'il, c'eſt
Philabel, cet homme
qui aimoit éperduëment
Fraudeliſe, qu'elle ne
pouvoit ſouffrir, & qu'el-
le a chaſſé de chez-elle
à cauſe de ſes manieres
libres & peu reſpectueu-
ſes. C'eſt le Maiſtre du
Rubis, interrompit An-
tigame, que je voudrois
connoiſtre ; il me ſem-
ble, reprit-il, que ce
Rubis reſſemble fort à
celuy que j'ay donné à
Leſbie, & je voudrois
bien ſçavoir d'où cet
homme le tient. Ah ! le
jaloux ? ah ! le jaloux ?
répondit en riant Phi-
logame, il croit que
Leſbie a donné ſon Ru-
bis à cet homme. J'en
ſuis fort éloigné, repli-
qua Antigame, & je
connois trop Leſbie pour
luy faire cette injuſtice :
Oüy, la pauvre fille
penſa mourir de douleur
quand il fut tombé du
châton, & qu'elle l'eut
perdu, & j'eus toutes les
peines du monde à l'en
conſoler.

Quoy qu'Antigame
fut bien perſuadé de la
fidelité de Leſbie, nean-
moins la maniere prom-
pte & bruſque avec la-
quelle cet homme avoit
caché ſon Rubis, ſa ſor-
tie précipitée du Caba-
ret pendant une groſſe
pluye, & la reſſemblan-
ce qu'il trouvoit dans ce
Rubis avec celuy qu'il
avoit donné à Leſbie,
l'inquietoient & luy cau-
ſoient un chagrin qui
fut apperçu de l'Abbé
Sophin, & qui l'obligea
d'appeller ſon Valet pour
luy ordonner de s'infor-
mer adroitement des
noms de ces deux hom-
mes : Ce Valet luy té-
moigna qu'apparament il
n'auroit pas beaucoup de
peine à les apprendre,
qu'ils avoient renvoyé
dans ce Cabaret un La-
quais pour attendre la ré-
ponſe d'une Lettre qu'on
y devoit apporter, que
ce Laquais eſtoit un
nouveau débarqué, qu'il
ſeroit bien facile de faire
jaſer avec une bouteille
de vin. Il y a un de ces
deux hommes, dit An-
tigame à ce Valet, qui
a un Rubis ; ſi tu pou-
vois apprendre, conti-
nua-t'il, de qui il le tient,
& comment il l'a eu,
que je t'aurois d'obliga-
tions, & que je les re-
connoiſtrois bien : Ce
Valet luy promit qu'il
alloit faire ſon poſſible
pour le ſatisfaire, & ſor-
tit enſuite de la chambre
à cet effet.

Cependant Philoga-
me, Antigame, & l'Ab-
bé Sophin ſe mirent à
raiſonner ſur ce qu'ils
venoient de voir. Anti-
game diſoit que jamais
Rubis n'avoit mieux reſ-
ſemblé à celuy qu'il avoit
donné à Leſbie que ce-
luy-là, & qu'en les pre-
ſentant enſemble, l'on y
ſeroit trompé. Philoga-
me prétendoit que la
pluſpart des Rubis ſe reſ-
ſembloient, & qu'il eſtoit
bien difficile d'en recon-
noiſtre la difference :
L'Abbé ne ſçavoit non
plus que penſer de la ſur-
priſe, & de l'étonnement
de ces deux hommes, &
de leur prompte retraite
nonobſtant la pluye.
Philogame avec un ai
fier & railleur ſoûtenoit
que Philabel touché de
ce qu'il alloit épouſer
Fraudeliſe, n'avoit pû
ſupporter ſa veuë, &
s'eſtoit retiré : Enfin cha-
cun raiſonnoit à ſa fan-
taiſie, quand le Valet
de l'Abbé vint leur ap-
prendre que l'homme au
Rubis s'appelloit Clean-
te, qu'une Demoiſelle
luy en avoit fait pre-
ſent & devoit encore
luy donner au premier
jour deux mille Loüis16
d'or, & ſe marier avec
luy : Que ce Laquais
qui eſtoit au ſervice de
Cleante n'avoit pû luy
apprendre le nom de la
fille, mais qu'il luy avoit
ſeulement dit, Qu'un
jour cette fille & Cleante
eſtant dans un Cabinet
de verdure du jardin de
Saint Cloud17, & parlant
enſemble, il s'eſtoit ca-
ché derriere ce Cabinet,
d'où il avoit oüy tout
ce qu'il venoit de dire.

Aprés que ce Valet
ſe fut retiré, Philogame
jettant les yeux ſur An-
tigame penſif & reſveur,
luy dit : C'eſt donc là ta
Leſbie, cette fille ſi tou-
chée de ce que le Rubis
que tu luy avois donné
eſtoit tombé du châton :
Helas ! cet accident de-
voit luy preſager que tu
ceſſerois de l'aimer ; elle
en devoit mourir, la
pauvre fille ; Remarque‑
tu ſon des-intereſſement,
& avec quelle fidelité
elle gardoit tes deux
mille Loüis20 : Cette fille
ſi éloignée de tout en-
gagement, qui haïſſoit
tous les autres hommes
pour n'aimer que toy ;
Ce cœur que tu tenois ſi
bien en haleine par la
diverſité des mouvemens
que tu luy donnois, &
par la crainte de te per-
dre ; Enfin ce cœur qui
t'aimoit d'une maniere ſi
fine, ſi délicate & ſi in-
connuë aux gens mariez.



N'accable point un
mal-heureux, repartit
Antigame, à qui ſe fier
preſentement ! s'écria‑
t'il ; Leſbie donner mon
Rubis à un mal-heureux,
& à un homme ſans
nom ; Leſbie m'eſtre
infidelle, Leſbie me
trahir, Leſbie vouloir
me voler.

A qui ſe fier, inter-
rompit Philogame, à
une fille de famille, bien
élevée, & qui vous re-
garde comme ſon époux ;
Enfin à Fraudeliſe qui
fait voir mille belles qua-
litez, & mille vertus.
Cet entretien fut inter-
rompu par le bruit d'un
Laquais qui portoit une
Lettre, & qui demandoit
Philabel dans la court.

Philogame mettant
la teſte à la feneſtre vit
que c'eſtoit le Laquais
de Fraudeliſe, ce qui le
fit rougir. Antigame ob-
ſervant ſa rougeur vou-
lut voir le Laquais qu'il
reconnuſt auſſi ; ſi bien
que ſans s'expliquer ſur le
ſoupçon qu'il eut que ce
Laquais apportoit peut‑
eſtre la réponſe qu'atten-
doit le Laquais de Cleante,
deſcendit promptement,
& ayant trouvé dans une
allée par où ce Laquais
devoit paſſer un endroit
ſi obſcur, qu'à peine pou-
voit-on diſcerner les gens ;
il s'y plaça pour l'y atten-
dre & quand il fut prés de
luy, il luy demanda tout
bas la Lettre de Fraudeliſe
en luy preſentant un écu23 ;
ce Laquais qui ne pou-
voit voir celuy qui luy
parloit à cauſe de l'obſ-
curité, qui n'allaſt pas
s'imaginer que ce fut
un autre que Philabel
qui luy demandoit cette
Lettre, & qui n'eſtoit
point fâché d'avoir un
écu, le prit prompte-
ment, donna la Lettre
ſans faire plus grande
reflexion, & ſe retira.
Antigame remonta auſſi-
toſt dans la Chambre où
il avoit laiſſé Philogame
& l'Abbé Sophin, &
aprés avoir décacheté
cette Lettre, il la pre-
ſenta à Antigame, & luy
demanda s'il en connoiſ-
ſoit le caractere ; Philo-
game répondit que la
Lettre paroiſſoit de Frau-
deliſe ; Antigame luy
apprit de quelle manie-
re il l'avoit euë : Vous
jugez bien de l'impa-
tience que Philogame &
l'Abbé eurent de la lire,
voicy comment elle eſtoit
conçûë.



Bandeau fleuri.

LETTRE.