Le mariage sous L'Ancien RégimeA VN NOVVEAV Marié. STANCES. Par le sieur du Rier.
TV t’es donc marié sans nous en dire mot,
Pauure homme qu’as tu faict ie te pensois plus sage,
Respons moy le beau fils n’estois tu assez sot
Sans te mettre en danger de l’estre davantage.
Mais puis que tu n’as peu euiter ton malheur
Encor ne faut il pas que tu te desesperes,
Combien voit on d’enfans auoir ce deshonneur
D’heriter comme toy au mal-heur de leurs peres.
Si tu veux viure en paix le reste de tes iours,
Et faire maintenant le salut de ton âme,
Il te faut endurer, & s’il te faut tousiours
Auoir deuant tes yeux la crainte de ta femme.
De crainte d’auoir pis n’entre point en soupçon
Sy tu vois qu’un amy deuant toy la caresse,
Car à vous voir tous deux vous auez la façon
Toy d’estre le valet & elle la maistresse.
On m’a dit que tu cherche un estat maintenant,
Et que vostre contract porte expres ceste clause,
Tu ne dois point quitter celuy de faineant
Car ie crois que tu nes capable d’autre chose.
x