Le mariage sous L'Ancien RégimeStances dv mariage.
1.
SI Dieu n'eust ordonné le facheux mariage,
Veu l'extresme fureur qui pousse mon courage,
Ie maudirois celuy qui premier en parla,
Mais estant le seigneur que mon ame reuere,
Ie retiens vn petit la bride à ma colere,
Et croy qui noZ pecheZ sont cause de cela.
2.
Mariage maudit plein d'extresme rigueur,
Ie ne te puis aymer ny supporter au cœur,
Ruyne des humains abysme de malice,
Cauteleux, soupçonneux, qui trancheZ noZ desirs,
Remede pour priuer l'homme de tous plaisirs,
Des vices le plus grand & le plus cruel vice.
3.
Que nous serions heureux si sans lier noZ ames
A ce traistre ennemy des amoureuses flammes,
Nous viuions en commun sans soupçon librement:
Mais cela ne se peut,car par le mariage
Nous entrons malheureux en vn si grand seruage,
Que cela me fait peur d’en parler seulement.
4.
Si le mary se plaist de demeurer aux champs,
La femme ayme la ville & s’y tient en tout temps,
Si bien qu’ils sont tousiours en guerre & en furie,
27
Ils ne se voyent point, ils souhaittent leur mort,
Donc si le mariage est tout plein de discord,
N’estimeZ vous pas sot celuy qui se marie ?
5.
Ou le mary ialoux, ou ialouse la femme,
Si la femme est ialouZe à tout' heure dans l’ame,
Elle se meurt d’ennuy & ne fait que crier,
Dieu sçait quel plaisir prend vn mary de la sorte,
Il voudroit estre mort ou veoir sa femme morte,
Il n’y a tel bon heur que d’estre à marier.
6.
Si vn homme prend femme auec peu de bien,
Il la veut gourmander, & si elle dit rien,
Alors de cent desdains sa colere est suyuie,
La femme en fait autant si elle a mieux dequoy,
Si bien que ie conclus, & pour certain ie croy
Que d'estre marié c'est vne pauure vie.
7.
Si vn homme prend femme & qu'elle soit fort belle,
Il faut pour son honneur qu'il en soit en ceruelle,
La plus-part des maris sont cocus auiourd'huy,
Ceste peur dans le cœur luy met la ialousie,
Iamais d'aucun plaisir il n'a l'ame saisie,
Le mariage donc n'apporte rien qu'ennuy.
8.
Si vne femme espouse vn mary qui soit beau,
Elle veut qu'il soit sien, & s'il puise d'autre eau,
Elle creue aussi tost de despit & de rage:
Ce despit,ceste rage accroissent tellement,
Qu'elle fait comme luy,si bien que proprement
Le mariage en fin est vn vray cocuage.
9.
Si vn mary se plaist à aymer l'inconstance,
I'ay quelquefois horreur de penser ce qu'il pense,
Il mesprise sa femme & ne la sçauroit voir,
Il va de tous costeZ, puis quand il vient au gitte,
Il se fasche, il se plaint, il crie, il se despite,
Le mariage donc n'est rien qu'vn desespoir.
10.
Si vne femme aussi ayme à faire l'amour,
Dieu sçait quand elle peut luy iouer vn bon tour,
De quelle affection elle luy rend le change,
Pour vn elle en fait deux, & ne cesse qu'alors
Que personne ne veut se seruir de son corps,
La femme n'a plaisir que quand elle se vange.
11.
Ennemy de mon bien importun mariage,
Si iamais l'on cognoit qu'en tes reZ ie m'engage,
Qu'on me tienne pour estre hors de tout iugement,
I'ay en toy recogneu trop de rigueur extreme,
Ie ne te puis aymer sans me hayr moy-meſme,
Heureux celuy qui peut euiter ton tourment.
x