Le mariage sous L'Ancien RégimeDE SILE.
SIle me veut pour son mari,
Et n'y a rien qu'elle ne face:
Mais moy i'en seroy bien marri,
Quelque contract qu'elle me passe.
Ainsi qu'elle m'en presse tant,
Tu me donneras, celuy di-ie,
Cinquante mille escus1 contant
Sans qu'à les rendre ie m'oblige.
Et pour le premiere nuitee
Ne gousteras point le deduit:
Mais tu t'en passeras couchee
Seule à part dans vn autre lit.
A ton nés, si ie le demande
I'auray ma garce entre mes bras:
Sans gronder, si ie le commande,
Ta servante m'enuoyeras.
Et le plus souuent à ta veuë
Pour caresser me ietteray,
Dessus la premiere venüe,
Et haut & bas la tasteray.
Quand nous irons en compagnie
Si loin l'vn de l'autre serons,
(Tant sois-tu paree & iolie,)
Que iamais ne nous toucherons.
De me baiser point de nouuelle
Garde toy de t'y presenter:
Si d'auenture ie t'appelle
Ta leçon ie te veux chanter.
Garde toy d'y estre si osee,
Si ma femme vne fois tu es,
Me baiser en femme épousee:
Car ie le trouueray mauuais.
Ne me baise comme ton frere
Il y auroit trop d'appetit:
Mais comme quelque bonne mere
Baiseroit son fils par acquit.
Si tu peux supporter en somme
Tout ceci sans rien refuser,
Touche là, tu as trouué l'homme
Qui est content de t'exposer.
Notes
- Pièce de monnaie.↑
x