XML | Métadonnées | Version originale
x
L’homme est bien malheureux

L’homme est bien malheureux

L’homme est bien malheureux qui s’empeche le dos
Du faix, & de l’esmoy, du facheus Mariage!
Dans vne mer de maus il va faire naufrage,
Et certe' en peu de chair il trouue beaucoup d’os!
L’Ocean mutiné regorge moins de flos,
Au souflement des ventz, messagers de l’orage:
Que son cœur agité de soingz, d’ire, & de rage,
Luy fera soûpirer de plaintes, & sanglos.
Soit belle ou layde, riche ou pouure sa compaigne,
Infertille ou feconde, en vain il s’acompaigne:
Car seul il participe à mille & mille ennuis.
Se plonge qui voudra dans cest abyme infame!
Quand à toy1 tout petit, & libre que ie suis,
I’ayme mieus espouser vne mort, qu’vne feme.

Notes

x

Indice aux ressources